Ignasi Colominas Ezponda

Son Catedrático de Universidade da área Matemática Aplicada. Estudei Enxeñería Industrial en Barcelona, onde me licenciei en 1991, e doutoreime, tamén en Enxeñería Industrial, na UDC en 1995. Obtiven o Premio Endesa en 1995 e o Premio Extraordinario de Doutoramento polos traballos da miña tese doutoral no desenvolvemento de métodos numéricos en aplicacións na enxeñería eléctrica. En 1999 obtiven o Premio Galicia de Investigación Científico-técnica para Investigadores Novos. Realicei estancias de investigación no Wessex Institute of Technology no Reino Unido, na University of Arizona e na Northwestern University en Estados Unidos. Formei parte da Comisión de Selección da Investigación da Xunta de Galicia, da Comisión de Avaliación de Profesorado Lector e Colaborador da Axencia para a Calidade do Sistema Universitario de Catalunya AQU, do panel de avaliadores da Axencia de Calidade do Sistema Universitario de Galicia ACSUG e da Axencia Nacional de Avaliación e Prospectiva ANEP e do panel de expertos do programa Academia da ANECA. 

Son autor dunha vintena de libros, de máis de 70 artigos en revistas internacionais e 200 comunicacións en congresos; dirixín 12 tese doutoral. Entre os cargos de xestión desempeñados cabe destacar que no período 1992 a 1999 fun subdirector xefe de Estudos da Escola Técnica Superior de Enxeñería de Camiños, Canles e Portos; de 2005 a 2013 fun director do Departamento de Métodos Matemáticos e de Representación da UDC e, do 2013 ao 2021, director da Escola Técnica Superior de Enxeñería de Camiños, Canles e Portos.