DEMOS UN PASO ADIANTE!. CAMBIEMOS!
Quenes gañaron as eleccións á reitoría da UDC ao longo do últimos vinte anos van perder o próximo 4 de decembro de 2023. Se gañasen, o réxime de goberno duraría 26 anos. Demasiado tempo.
Hai que cambiar porque as súas ideas e a súa xestión xa non dan máis de si. Con todo, que sexan outros quen goberne a UDC non supón, necesariamente, un cambio. Pode ser só unha substitución. O cambio está en que cambiemos todos. Porque todos e cada un de nós somos o modelo da UDC.
Tres palabras poden resumir un modelo digno dunha comunidade universitaria: amor, traballo e loita. Amor polo coñecemento; traballo para aplicalo; e loita co fin de mellorar a vida dos que nos formamos e traballamos nela. Amor, traballo e loita dos Estudantes, dos Profesores e do Persoal Técnico, de Xestión e de Administración e Servizos. Custa seguir o rastro destes tres eixos da vida universitaria despois da Pandemia. Para atopalas e reconciliarnos con elas temos que cambiar.
Porque aspiramos a unha cultura universitaria de participación e deliberación ao redor da diversidade cultural e a crise ecolóxica. Cambiemos unha Universidade gobernada autoritariamente por unha xestionada democraticamente e conforme ás leis, e en particular á Lei 15/2022, do 12 de xullo, integral para a igualdade de trato e a non discriminación.
Por iso propoñemos un novo modelo de gobernanza, con fórmulas rupturistas, un goberno verdadeiramente plural e multinivel que combine as tradicionais vicerreitorías con outras formas de organización máis orixinais e flexibles nas que tanto os nosos e nosas estudantes como o Persoal Técnico, de Xestión e de Administración e Servizos se impliquen no goberno da casa de todos e todas: a nosa Universidade.
Sen a máis mínima dúbida apostamos por combinar cultura con civilización técnica. Unha universidade que as xunte e que integre a Ciencia, as Humanidades, a Técnica e a Tecnoloxía, incluíndo as TIC. Un modelo universitario que non maltrate as Ciencias da Saúde e do Traballo, nin as Ciencias Sociais e da Educación, nin as Humanidades ou a Psicoloxía.
Queremos unha universidade que loite contra a precariedade e que faga predicible e segura a carreira docente, a formación investigadora e a xestión dos postos de traballo. Unha Universidade que practique a transparencia e sométase a ela.
En definitiva, a nosa é unha proposta de participación, innovación organizativa e equilibrio no modelo de Universidade para o próximo sexenio. É hora de cambiar a política, a cultura e a dinámica laboral da UDC con prácticas democráticas, mellor coñecemento e máis transparencia. Pero, sobre todo, chamamos a mobilizar o noso amor por saber, a nosa vocación polo traballo e a loitar por unha UDC sen dobres vías.
Queremos producir un cambio de mentalidade. Si, tamén haberá que reparar algunhas infraestruturas físicas. Pero antes de tapar as fochas e arranxar as pingueiras é importante que cambiemos os nosos sentimentos. Estamos nun momento en que o novo pugna por saír e o vello apenas nos deixa respirar. O modelo de universidade somos nós.
Fagámolo!
Cambiemos!
Algúns pensarán que un modelo de universidade require propostas concretas. Non lles falta razón. Ao longo do programa que se detalla a continuación inclúese un feixe deles. Seguro que a lista non está completa, pero haberá tempo para completalas.
FAGÁMOLO!
CAMBIEMOS!
2023 © Fermín Navarrina
Diseño y desarrollo: TNR
