Eficacia na xestión

O labor que desempeña o Persoal Técnico, de Xestión e de Administración e Servizos (PTGAS) na UDC é decisiva, como colectivo que cumpre con labores fundamentais para a administración da Universidade, o coidado dos centros, o correcto funcionamento de bibliotecas e laboratorios, a atención aos estudantes, etc.

A eficacia na xestión é unha idea transversal no seo do noso programa. E mentres os cambios que reclaman outras facetas da Universidade, como a docencia ou a investigación, requiren unha acción moi significativa de estudantes e profesores/as, se desexamos unha xestión máis próxima, áxil e eficaz, boa parte do esforzo terá que recaer no PTGAS, un colectivo de grande relevancia á hora de tomar decisións que afectan ao conxunto da institución.

O noso obxectivo principal

Conseguir unha maior participación en aspectos relacionados co goberno da Universidade e un mellor funcionamento da mesma en todas as áreas, mediante unha organización optimizada que redunde nunha maior eficacia na xestión e que poña en valor o traballo do PTGAS.

As nosas propostas

Deixar de solicitar o apoio e voto dos nosos compañeiros/as do Persoal Técnico, de Xestión e de Administración e Servizos para un equipo composto integramente por membros do PDI. Nesta liña, e en coherencia coa nosa vontade, que a redacción da LOSU aponta, preténdese reforzar a Secretaría Xeral da Universidade e que se integre dentro do equipo de goberno, en calidade de Secretario Xeral, un membro do Persoal Técnico, de Xestión e de Administración e Servizos con titulación universitaria.
Nomeamento dun Comisario entre o Persoal Técnico, de Xestión e de Administración e Servizos para negociar aspectos puntuais como a RPT.
Nomeamento dun Segundo Comisario do Persoal Técnico, de Xestión e de Administración e Servizos nun posto específico de dirección da Unidade de Servizos.

A nosa estratexia

Propoñémonos realizar unha análise detallada do funcionamento de cada un dos servizos universitarios, que detecte os seus puntos débiles. Iso permitiranos establecer en cada un deles un plan estratéxico que permita corrixir as súas deficiencias, mediante a selección duns obxectivos claros e realistas e o establecemento de prazos para a súa execución.

As nosas propostas

Profesionalización da xestión.
Mellora das condicións de traballo.
Mellora da formación.
Maior implicación do PTGAS co goberno, obxectivos e finalidades da Universidade.

Desenvolvemento dos compromisos e as propostas:

Profesionalización da xestión
O PDI non debe desempeñar labores que corresponden ao PTGAS, pois o profesorado, moitas veces falto de experiencia administrativa, realiza funcións para as que non sempre está correctamente capacitado: nin o PDI debe realizar funcións correspondentes ao PTGAS, nin debe descargarse no PTGAS, que carece das atribucións precisas para asumilas, responsabilidades estratéxicas de política universitaria.
Detectar os problemas na xestión universitaria para unha correcta percepción das necesidades de cada un dos actuais Departamentos e Centros, así como os diversos Servizos, de xeito que se evite a falta de persoal en servizos moi necesarios para toda a comunidade universitaria.
Revisar periodicamente a RPT, de acordo con os Estatutos, adecuándoa ás necesidades que se detecten na xestión e apoio á docencia e investigación, mediante un proceso que se base no diálogo e a negociación entre todos os estamentos universitarios.
Establecer vías para a estabilización e promoción do PTGAS, pois unha vez realizada esa detallada análise previa e trazada a nova RPT, será posible mesmo propoñer unha ampliación do persoal e facilitar no posible a promoción interna, en pos dunha verdadeira carreira profesional.
Celebrar periodicamente concursos de traslado, pois tras cada revisión da RPT será posible convocalos de forma áxil e ordenada.

Recorrer ao mérito e a capacidade como criterios únicos de valoración: propoñémonos que na Universidade todas as actuacións se realicen con transparencia e equidade e que o mérito e a capacidade sexan os únicos criterios obxectivos de xuízo, moi especialmente no que toca á promoción horizontal e vertical. Darase preferencia aos concursos de méritos sobre os postos de libre designación.
Establecer para o PTGAS sistemas de avaliación semellantes aos que existen para o PDI.
Establecer diálogo coas restantes Universidades do SUG co fin de explorar novas posibilidades para o persoal que desexe trasladarse por razóns persoais, familiares ou profesionais.

Mellora das condicións de traballo
Reforzar o Servizo de PTGAS e articular unha orde telemática de entrada de solicitudes de necesidades de persoal e absoluta transparencia na xestión das listas de espera.
Acabar coa externalización a empresas privadas de servizos que poidan ser cubertos por PTGAS.
Mellorar a distribución de recursos humanos nas seccións de todos os servizos en función das necesidades.
Evitar cambios frenéticos nos concursos de traslados, unidades descabezadas e perda de know-how, implantando protocolos de formación na entrada de postos e evitando solapamentos de persoal.
Achegar a administración ao usuario, co apoio de PTGAS destinado nos propios centros, facultades e servizos.
Reducir os procedementos burocráticos, sen que iso se traduza en ningún menoscabo das garantías que deben acompañar a calquera acto administrativo. Boa parte das queixas que se fan públicas gardan relación cos servizos de apoio á investigación, cuxo funcionamento resulta especialmente necesario axilizar e optimizar, evitando innecesarias duplicidades.
Redactar manuais de funcións e procedementos: para facilitar a adecuación entre as diferentes tarefas que deben desenvolverse e os distintos membros do Persoal de Administración e Servizos, deseñarase, coa participación de comisións nas que estean representadas o PTGAS funcionario e laboral, un manual de funcións do PTGAS e os manuais de procedementos precisos para cada un dos servizos.
Ofrecer ao PTGAS un compendio estruturado de toda a normativa existente e axilizar a comunicación dentro da administración, de xeito que se transmita con celeridade calquera información pertinente para o día a día do labor de xestión: cambios na lexislación xeral, modificacións na normativa propia da Universidade, transformacións nos procedementos administrativos, etc.
Potenciar as políticas xerais de saúde laboral dentro da Universidade.
Deseñar unha política efectiva de conciliación da vida laboral coa familiar.
Establecer un código deontolóxico de conduta que presida as relacións entre os membros da comunidade universitaria.

Como no referido ao profesorado, somos conscientes de que a actual situación pola que atravesa o país non é o marco indicado para poñer en práctica con facilidade algunhas das nosas propostas, pero tampouco no caso do PTGAS queremos acollernos a iso como unha escusa para non expor os problemas e arbitrar fórmulas para resolvelos.

Mellora da formación
Valorar a formación continua do PTGAS, que debe ter para a Universidade a mesma consideración que a do PDI e haberá de contribuír de modo decisivo á mellora da UDC.
Elaborar un plan de formación continua de calidade, previa consulta dos interesados, que permita responder ás demandas xerais de formación que emanen dos diferentes colectivos (cursos de idiomas, principios de informática, lexislación básica e universitaria, linguaxe administrativa, cursos de atención ao público, etc.) e proporcionar formación específica para cada posto de traballo, o que repercutirá necesariamente nunha mellora da calidade do servizo e, ao tempo, facilitará a promoción profesional dos actuais e futuros membros do PTGAS.
Deseñar o plan de formación continua de modo que, na medida do posible, poida conciliarse coa xornada laboral, resulte de fácil acceso ao PTGAS, mediante a súa descentralización, e non supoña un custo económico para os traballadores.
Procurar que calquera introdución ou renovación das ferramentas empregadas no labor de xestión sexan acompañadas das instrucións e explicacións precisas.
Impulsar a sinatura de convenios destinados á mobilidade formativa do PTGAS, con vistas a facilitar a realización de estancias noutras Universidades e institucións nacionais e internacionais.

Maior implicación do PTGAS cos obxectivos e finalidades da Universidade

Integrar de maneira efectiva ao PTGAS no Goberno da Universidade, de tal modo que non sexa só un ámbito reservado en exclusiva ao PDI, tal e como contempla a LOSU.
Firme compromiso de diálogo estable e continuo coa Xunta de Persoal, sendo inadmisible que non exista comunicación en extremos tan transcendentais como a modificación da RPT.
Implicar ao PTGAS na investigación. Boa parte do PTGAS destinado á xestión viu reducido tradicionalmente o seu papel a determinadas instancias administrativas, deixando de participar nalgunhas das facetas que reclamamos como características da Universidade, como a investigación. Sen dúbida debe existir un Servizo de Investigación que apoie aos investigadores nas denostadas tarefas burocráticas que levan aparellados os proxectos de investigación —repetidamente denunciadas como excesivas—, pero fronte a un modelo de compartimentos estancos, nada permeables, defendemos o achegamento do PTGAS á tarefa investigadora, a súa participación en proxectos e contratos, aos que pode achegar o seu coñecemento especializado, do mesmo xeito que xa o veñen facendo, aínda que aínda en menor medida do desexable, os técnicos de laboratorio ou o persoal de bibliotecas.
Potenciar os actuais servizos. En liñas xerais, debe procurarse sacar un maior proveito aos diferentes servizos existentes no organigrama e que moitas veces non son suficientemente coñecidos polos propios membros da comunidade universitaria, que ignoran o modo en que poden colaborar con eles.
Fortalecer os vínculos da Universidade co persoal xubilado. Sería de desexar que o PTGAS, do mesmo xeito que o profesorado, puidese manter tras a xubilación una certa vinculación coa Universidade á que serviu durante tantos anos.
Incrementar o diálogo. Comprometémonos a manter abertos todas as canles de diálogo e participación que fosen necesarios para que o PTGAS non se autoexcluya da vida universitaria e ses parte esencial dun proxecto universitario único e común.